Hjartarannsókn ehf var stofnað í janúar 2005 til að annast áhættumat Hjartaverndar.
Hjartavernd hefur staðið fyrir opnu áhættumati fyrir almenning í nærri fjóra áratugi. Í áhættumatinu geta einstaklingar fengið mælingar á helstu áhættuþáttum hjarta- og æðasjúkdóma og heildstætt mat á því hverjar líkurnar séu á því að það fái hjartasjúkdóm síðar á lífsleiðinni.
Matið hefur tekið breytingum í áranna rás eftir því sem þekkingu á hjartasjúkdómum hefur fleygt fram. Áhættumatið grundvallast á þessum hefðbundnu áhættuþáttum: reykingum, háum blóðþrýstingi, háum blóðfitum, ættarsögu, offitu, sykursýki og hreyfingarleysi.
Rannsóknir Hjartaverndar hafa sérstaklega skoðað þýðingu þessarra áhættuþátta í Íslendingum og innbyrðis vægi þeirra. Rannsóknir þessar hafa verið notaðar til að útbúa reiknilíkan eða áhættureiknivél sem metur áhættu hvers og eins.